निर्गमन 24
Awadhi Bible: Easy-to-Read Version
यहोवा अउ इस्राएल क बीच करार
24 परमेस्सर मूसा स कहेस, “तू हारून, नादाब, अबीहू अउ इस्राएल क सत्तर पुरनिया नेता पहाड़े प आवा अउ कछू दूर होइ के मोर आराधना करा। 2 तबहिं तू अकेले ही मोर निअरे आवइँ। दूसर कउनो लोग यहोवा क निचके न आवइँ अउ बाकी बचा भवा लोग पहाड़े क निअरे न आवइँ।”
3 इ तरह मूसा यहोवा क सबहिं नेम अउ आग्या क लोगन क बताएस। तब सबहिं मनइयन कहेन, “यहोवा जउन सबहिं आग्या क दिहेस ओका हम सब मानब।”
4 ऍह बरे मूसा यहोवा क सबहिं आग्या क चाम पत्तर प लिखेस। भियान भिन्सारे मूसा उठा अउ पहाड़े क तलहटी क निचके एक वेदी बनाएस। अउर उ बारह पाथर इस्राएल क बारहु परिवार समूह बरे खड़ा किहेस। 5 तब मूसा इस्राएल क जवानन क बलिदान दइ बरे पठएस। उ पचे यहोवा बरे होमबलि अउ सान्ति क भेंट बरे बर्धा क बलि दिहेन।
6 मूसा ओन जनावरन क खून बटोरेस। मूसा आधा खून खोरा मँ धरेस। अउर दूसर आधा खून वेदी प उड़ेरेस।[a]
7 मूसा चाम पत्तर प लिखा भवा करार क पड़ेस। मूसा करार क ऍह बरे पढ़ेस कि सब लोग ओका सुन सकइँ। अउ लोग कहेन, “हम लोग ओन नेम क सुन लिहेन ह जेका यहोवा हम पचन्क दिहेस ह। अउर हम सब मनइयन ओनका मानइ क बचन देत अही।”
8 तब मूसा खून स भरा खोरा बलि स लिहेस अउ ओका लोगन प छिछकेस। उ कहेस, “इ खून बतावत ह कि यहोवा तोहरे संग अउ ओन सबइ बातन क लगइ क जउन हम पचन्क कहेन।”
9 तबहिं मूसा, हारून, नदब, अबिहु अउ इस्राएल क सत्तर पुरनियन नेता लोग पहाड़े प चढ़ेन। 10 इ मनइयन इस्राएल क यहोवा क पहाड़े प ठाड़ भवा लखेन। यहोवा कउनो अइसे अधार प ठाड़ रहेन जउन नीलमणि जइसा देखात रहा। अइसा निर्मल जइसा अकास। 11 इस्राएल क सबहिं नेता लोग यहोवा क लखेन, मुला यहोवा ओनका बर्बाद नाहीं किहेन।[b] उ पचे साथ खाएन अउ पिएन।
मूसा परमेस्सर क नेम पावइ जात ह
12 यहोवा मूसा स कहेस, “मोरे लगे पहाड़े प आवा। मइँ आपन उपदेसन अउ आदेसन क दुइ ठु समथर पाथरे क पाटी प लिखे अही। इ आदेसन मनई बरे अहइँ। मइँ इ पाथर क समथर पाटी क तोहका देइहउँ।”
13 ऍह बरे मूसा अउ ओकर मददगार यहोसू यहोवा क पहाड़े ताई गएन। 14 मूसा चुने भए नेतन स कहेस, “हम दुइनउँ क हिअँइ जोहा। हम तोहरे लगे लउटब। जब तलक मइँ गैर हाजिर रहब, हारून अउ हूर तोहार सासकन रइहीं। ओनके लगे जा जदि कउनो क समस्या होइ।”
मूसा क यहोवा स मिलन
15 तब मूसा पहाड़े प चढ़ा। अउर बादर पहाड़ क ढाँपि लिहेस। 16 परमेस्सर क महिमा सीनै पहाड़े प उतरी। बादर छ: दिना तलक पहाड़े क मूँदे रहा। सतएँ दिन यहोवा, बादर मँ, स मूसा स बोला। 17 इस्राएल क लोग यहोवा क महिमा क लख सकत रहेन। इ पहाड़े क चोटी प भरभराइ क बरत आगी क नाई रहा।
18 तबहिं मूसा बदरे मँ थोड़ा ऊपर पहाड़े प चढ़ा। मूसा पहाड़े पर चालीस दिन अउ चालीस रात रहा।
Footnotes
- 24:6 मूसा … उड़ेरेस खून यहोवा अउ मनइयन क बीच करार क पक्का करइ बरे बइपरत रहेन। खून वेदी पर इ देखावइ बरे उड़ेरा जात रहा कि यहोवा करार मँ साथे बा।
- 24:11 यहोवा क … किहेन बाइबिल कहत ह कि मनई परमेस्सर क नाहीं लख सकलेन। उ निराकार अहइ। मुला यहोवा चाहत रहा कि इ नेता ओका कउनो खास तरह स लखि सकइँ। तउ यहोवा ओनका आपन दरसन करइ दिहस।
Awadhi Bible: Easy-to-Read Version. Copyright © 2005 Bible League International.